MANILA, Philippines — Malaki ang tiwala ni coach Michael “Myk” Saguiguit sa kanyang University of Perpetual Junior Altas sa magandang kampanya sa Junior’s division ng Season 95 National Collegiate Athletic Association (NCAA) na magbubukas sa Linggo (July 7) sa MOA Arena sa Pasay City.
Binase ni Saguiguit ang kanyang prediksyon sa kanilang impresibong performance sa Fil Oil Pre-Season 2019 Cup matapos ilampaso ang UST Cubs, FEU Diliman, JRU Light Bombers at La Salle Greenhills sa elimination round.
Sasandal si Saguiguit kina holdovers Emman 'The Assassin' Galman, Edzel Galoy, Yuki Kawamura, Jearico 'The Bull' Nuñez, Shin Dela Cruz, Kyle Cuevas at Shawn Orgo.
Inaasahan din ang mga rookies na sina John Escalante na galing ng Ateneo de Zamboanga at ang dalawang former Adamson Baby Falcons na sina Mark Banaticla at John Vincent Berwite.
Naidagdag pa sa koponan sina 6'5 center Johndel Balazuela, Alfonso Manuel, beanpole shooter Angelo Gelsano, Jose Mary Ignacio at Gabriel Angeles.
Hangad ni Saguiguit na malampasan nila ang 5th hanggang 6th placed finished sa nakalipas na season kung saan humakot sila ng 9-9 win loss record kasama ang LPU GenTri.
“I know the boys will show their character this season, with the support of the management and the team owner Boss Tony Tamayo,” ani Saguiguit.