Dasmariñas itataya ang korona vs Ghana boxer
MANILA, Philippines — Itataya ni Michael “Gloves on Fire” Dasmariñas ang kanyang suot na IBO World Bantamweight crown laban kay undefeated boxer Manyo “Black Flash” Plange ng Ghana sa Setyembre 29 sa Marina Bay Sands sa Singapore.
Ang nasabing laban ay inihahandog ng Ringstar Boxing, ang pinakamainit na sports media property sa Asya.
Kasalukuyang bitbit ng 26-anyos na si Dasmariñas, tubong Camarines Sur, ang 26-2-0 win-loss-draw ring record at nanggaling sa isang three-week training camp sa Kashiwa, Japan bilang paghahanda kay Plange.
Hawak naman ni Plange ang malinis na 17-0-0 card.
Nagmula si Dasmariñas sa fourth round KO victory laban kay French boxer Karim Guerfi noong Abril 20 sa Singapore para makamit ang IBO World Bantamweight title.
“Excited po akong lumaban ulit, sana bukas na ang laban ko,” sabi ni Dasmariñas. “Bilang isang boxer, pinagbubutihan ko ang training ko sa nalalapit na laban na ito. Kasing tindi ng huli kong training ang ginagawa ko, pero ngayon mas gusto ko pang patunayan ang sarili ko bilang isang IBO World Bantamweight champion.”
Kumpiyansa naman si Ringstar Founder Scott Farrell na tatalunin ni Dasmariñas si Plange. (Cadayona)
- Latest
