MANILA, Philippines — Tatlong Pinoy cue masters ang umusad sa fourth round ng 2018 World Pool Series – Rasson 10-Ball Masters Championships na ginaganap sa Steinway Billiards sa New York City.
Umariba agad sina dating world champion Dennis Orcollo, Alex Pagulayan at Lee Vann Corteza para manatiling malinis ang kanilang record sa torneong may nakalaang $8,000 sa magkakampeon.
Tangan ang opening-round bye, sunud-sunod na iginupo ni Orcollo sina Fedor Gorst ng Russia sa second round (11-6) at dating world titlist Ralf Souquet ng Germany sa third round (11-6).
Sasargo si Orcollo sa fourth round laban kay Shane Van Boening ng Amerika na nagtala ng 11-5 panalo sa kababayang si Shaun Wilkie,
Pasok sa fourth round si Pagulayan nang igupo nito sina Hunter Lombardo ng Amerika (11-9) sa second round at Kaci Klenti ng Albania (11-6) sa third round).
Umani ng first-round bye si Pagulayan.
Hataw din si Corteza na nagtala ng 11-3 panalo laban kay Ehmunrao Toocaram ng Mauritius sa first round bago pinataob ang beteranong sina Pinoy cue master Ronnie Alcano sa second round (11-2) at dating world champion Mika Immonen ng Finland sa third round (11-8). (CCo)