Celtics tambak sa Cavs

BOSTON — Pinanguna­han ni LeBron James ang Cleveland Cavaliers sa kumbinsidong 121-99 paggupo sa Celtics na tinampukan ng debut ni Fil-American guard Jordan Clarkson.

Wala nang nagawa si Paul Pierce, nakaupo sa courtside at nakasibilyan, kundi ang panoorin ang kabiguan ng dati niyang koponan.

Habang hinihintay ng Celtics great ang pagtataas ng kanyang No. 34 sa Boston Garden rafters ay ipinagpag naman ni James ang isang first-quarter leg injury para kumamada ng 24 points, 10 assists at 8 rebounds sa panig ng Cavs.

“I know the guys that are here are very excited about this opportunity,” wika ni James. “It’s my job to as the leader of this team to make sure that I acclimate the new four guys to be around a culture that’s built around winning.”

Nagdagdag naman si Clarkson ng 17 points  habang may 15 at 12 mar­kers sina Rodney Hood at George Hill, ayon sa pag­ka­kasunod at tumapos si Larry Nance Jr. na may 5 points.

Nakipag-ensayo ang apat sa Cleveland noong Sabado matapos ang nangyaring three-team trade ng Cavaliers, Los Angeles Lakers at Utah Jazz.

Umiskor si James ng 13 points sa second quarter --ang walo rito ay bahagi ng 13-2 atake na nagbigay sa Cleveland ng double-digit lead mula sa one-point deficit sa Boston.

Naitayo ng Cavaliers ang 27-point lead sa fourth period at nagsimula ang mga fans na sumigaw ng “We want Paul Pierce!”

Ngunit nanatili si Pierce sa baseline seat at hinihintay ang postgame ce­remony kung saan itataas ang kanyang No. 34 sa TD Garden rafters--ang ika-23 player sa history ng most-decorated franchise ng NBA.

“It definitely gave me chills, especially with Le­Bron out there,” sabi ni Pierce sa mga reporters.

Nagtala si Terry Rozier ng 21 points at 9 assists para sa Celtics habang nagdagdag si Kyrie Irving ng 18 markers laban sa dati niyang koponan bago ipahinga sa fourth quarter.

Ito ang ikatlong kabiguan ng Boston sa huli nilang apat na laro at naiwanan ng Toronto Raptors sa Eastern Conference playoff race.