MANILA, Philippines – Lalapit ang San Beda College para sa minimithing sweep sa pakikipagtuos sa nagdedepensang Arellano University ngayong araw sa pagpapatuloy ng NCAA Season 92 men’s football tournament sa Rizal Memorial Football Field.
Maghaharap ang Red Booters at Chiefs sa alas-12 ng tanghali, habang magpapang-abot naman sa ikalawang laro sa alas-2 ng hapon ang Lyceum of the Philippines University at College of Saint Benilde.
Nanggaling ang San Beda mula sa 2-1 panalo laban sa Lyceum tampok ang pagbibida ni Filipino-British Connor Tacagni na siyang kumana ng dalawang goals noong Martes upang manatiling malinis ang rekord ng Mendiola-based booters.
“We are focused on winning our last two games because we all want to regain the championship,” wika ni San Beda coach Michael Pediamonte.
Determinado ang Red Booters na makuha ang ika-22 titulo nito sa liga.
Dalawang panalo na lamang ang kinakailangan ng San Beda para awtomatikong umusad sa finals bitbit ang ‘thrice-to-beat ‘advantage.
Matapos ang Chiefs, sunod na makakasagupa ng Red Booters ang Blazers sa susunod na linggo.
Malinis din ang baraha ng St. Benilde sa semis nang ilampaso ang Arellano noong Martes sa pamamagitan ng 2-0 desisyon upang manatiling buhay ang pag-asa sa titulo.
Sa juniors division, hangad naman ng Arellano na maipagpatuloy ang magandang ratsada sa pakikipagtipan sa San Beda sa alas-8 ng umaga.
Sinorpresa ng Junior Chiefs ang reigning titlist na La Salle-Greenhills, 1-0, mula sa umaatikabong goal ni Kent Talam sa ika-64 minuto ng laro.
Ngunit mataas ang moral ng Junior Red Booters na mula sa impresibong 5-0 demolisyon laban sa Letran Squires.