MANILA, Philippines – Ipinagpag ni Manny Pacquiao ang kanyang sipon, pamimitig ng mga binti at ang matapang na prediksyon ni Jessie Vargas para sa kanilang laban sa Nov. 5 sa Thomas & Mack Center sa Las Vegas.
Naging impresibo si Pacquiao sa sparring noong Huwebes habang papalapit ang kanillang WBO welterweight title clash ni Vargas.
Noong nakaraang linggo ay dalawang araw siyang hindi nag-ensayo matapos magkaroon ng sipon at noong Huwebes ay nahinto ang pagsasanay niya matapos magkaroon ng leg cramps.
Kamakailan ay sinabi ni Vargas, ang may hawak ng korona na dating suot ni Pacquiao, sa boxing media sa United States na papabagsakin niya ang Filipino icon sa loob ng eight rounds.
Maaaring narinig ito ni Pacquiao .
“That’s easy to say but hard to do,” wika ni Pacquiao, lalaban sa unang pagkakataon matapos mailuklok bilang Senator sa Philippine elections noong Mayo.
“That’s impossible,” dagdag pa nito.
Hindi ito imposible dahil noong 2012 napabagsak siya ni Juan Manuel Marquez sa final chapter ng kanilang bakbakan.
Ngunit si Vargas ay hindi si Marquez.
Hindi nagbigay ng kanyang prediksyon si Pacquiao lalo na tungkol sa knockout dahil huli siyang nagtala nito noong 2009 laban kay Miguel Cotto .
“I’m just doing my best in training,” sabi ni Pacquiao, magtutungo sa Los Angeles sa October 22 para sa isang linggong training sa Wild Card Gym.