MANILA, Philippines – Sinamantala ng Jumbo Plastic ang hindi paglalaro ni Kiefer Ravena para sikwatin ang kanilang ikalawang sunod na kampeonato.
Pinatumba ng Jumbo Plastic ang Mighty Sports, 80-68, sa Game Three ng PCBL Chairman’s Cup Finals sa Marikina Sports Center.
Bago ang pagdakma sa kampeonato ay binalikan muna ng Linoleum Giants ang Mighty Sports sa Game Two kung saan nila nilusutan ang Mighty Sports sa overtime para itabla sa 1-1 ang kanilang best-of-three championship series.
Muling sumakay ang Jumbo Plastic sa mga balikat ni scoring guard Jeff Viernes sa torneong sinuportahan ng LGR, During’s Barbeque and Restaurant, Spalding, Ambucore, Hahn Manila at Leatherman.
Umiskor si Viernes ng pitong sunod na puntos sa huling dalawang minuto ng fourth quarter para ibigay sa Linoleum Giants ang 70-63 abante.
Tumapos si Viernes na may 21 points para hirangin bilang Finals Most Valuable Player.
Nauna nang nagpsabog si Viernes ng 31 markers sa kanilang panalo sa Game Two.
“We got a big break when Ravena didn’t play, but I think even if he played, the players will have the same mindset as they became more confident after we won Game 2,” sabi ni coach Stevenson Tiu matapos ang kanilang paghahari sa torneo.
Nabigo si Ravena na maibigay sa Mighty Sports ang korona matapos maimintis ang kanyang three-point shot sa pagtunog ng final buzzer sa kanilang overtime loss.
Matapos ang nasabing laro ay kaagad umalis ang two-time UAAP MVP patungo sa London.
Naglaro rin ang Mighty Sports nang wala si Kevin Ferrer, kumakampanya para sa Gilas cadets squad sa SEABA Stankovic Cup sa Bangkok, Thailand.
Sinandigan ng Mighty Sports sina Best Import Bright Akhuetie, Mac Montilla,Drian Celada at point guard Allan Mangahas para makuha ang 35-28 halftime lead.
Nagtala si Akhuetie ng 14 points.
Jumbo Plastic 80 – Viernes 21, Eguilos 18, Martinez 15, Taganas 12, Arafat 7, Santos 5, Lopez 2, Arellano 0, Siruma 0, Ibay 0.
Mighty Sports 68 – Akhuetie 14, Mangahas 9, Lopez 9, Montilla 8, Banal 8, Celada 6, M. Bringas 6, A. Bringas 5, Regalado 3, Melocoton 0.
Quarterscores: 15-16; 28-35; 53-52; 80-68.