MANILA, Philippines – Nananatiling paboritong manalo si eight-division world boxing champion Manny Pacquiao laban kay Timothy Bradley Jr. base sa online betting ng lootmeister.com.
Pabor ang tayaan kay Pacquiao na may -320 habang si Bradley ay may +240.
Maraming naniniwala na magwawagi ang Pinoy boxing hero kontra kay Bradley sa kanilang bakbakan sa Abril 9 sa MGM Grand Arena sa Las Vegas, Nevada.
Ito ang ikatlong pagkakataon na maghaharap sina Pacquiao at Bradley.
Sa kanilang unang paghaharap noong 2012, nagwagi si Bradley via split decision subalit nakabawi si Pacquiao noong 2014 sa bisa naman ng unanimous decision win.
Sinasabing ito na ang huling laban ni Pacquiao sa kanyang karera.
“The motivation is clear--for him to go out on a high note against a quality fighter,” nakasaad sa ulat ng lootmeister.com. “Pacquiao obviously wants to end his legendary career on a positive note.”
Ilang buwan ding nagpahinga si Pacquiao matapos matalo kay Floyd Mayweather Jr. noong Mayo ng nakaraang taon via unanimous decision.
Kaya’t inaasahang gigil si Pacquiao na makabalik sa ibabaw ng ring upang maibalik ang ningning sa kanyang kamao.
Sa kabilang banda, si Bradley ay galing sa dalawang sunod na panalo noong nakaraang taon.
Tinalo nito si Jessie Vargas noong Hunyo via unanimous decision kasunod ang impresibong technical knockout win kay Brandon Rios noong Nobyembre.
“A genuinely-improved Bradley could give this version of Pacquiao some major issues. Against Rios, he looked more energetic, was bouncier on his toes, and just had an overall increased crispness,” ayon pa sa ulat.