MANILA, Philippines – Magkakaroon ng pagkakataon ang mga tinitingalang chess players ng bansa na makilatis ang kanilang abilidad laban sa mga mabibigat na dayuhan sa paglarga ng dalawang magkasunod na international tournaments sa Subic Bay.
Mga GMs na ang ELO rating ay nasa 2600 ang mga tutungo sa bansa para sumali sa Philippine International Chess Championships at PSC/Puregold International Chess Challenge.
Ang Subic Bay Peninsular Hotel ang siyang venue ng dalawang malalaking torneo at mula Nobyembre 8 hanggang 14 ang unang kompetisyon at ang ikalawang palaro ay mula Nobyembre 15 hanggang 21.
Sinahugan ang torneo ng tig-$26,150 para sa Open, Female at Junior category at $5,000 ang makukuha ng magkakampeon sa Open category.
Ang mga GMs sa pangunguna ng 2015 Battle of the Grandmasters na si Richard Bitoon bukod pa kina Eugune Torre, Rogelio Antonio, Darwin Laylo at John Paul Gomez ang mga magdadala ng laban sa bansa.
Hindi naman pahuhuli sina IM Haridas Pascua, IM Paolo Bersamina at WIM Janelle Mae Frayna na gustong manalo para makumpleto ang pagkuha ng GM norms para maging ganap na Grandmasters na.
Sa Nov. 8 ang da-ting ng mga dayuhang manlalaro at kinabukasan sisimulan ang torneo. (AT)