Shakey’s V-League Ateneo pupuwesto sa semis vs Arellano
Laro Ngayon
(The Arena, San Juan City)
12:45 p.m. UP vs UST
3 p.m. Arellano vs Ateneo
MANILA, Philippines - Ipuwesto ang sarili sa semifinals ang hanap ngayon ng Ateneo Lady Eagles habang solo ikalawang puwesto ang nais ng UST Tigresses sa pagpapatuloy ng Shakey’s V-League Season 12 Collegiate Conference quarterfinals sa The Arena sa San Juan City.
Katipan ng Lady Eagles ang Arellano Lady Chiefs sa ikalawang laro na magsisimula matapos ang pagtutuos ng UP Lady Maroons at UST sa ganap na alas-12:45 ng tanghali.
Hindi pa natatalo ang Ateneo at ang ikalimang sunod na panalo ang magtitiyak na ng puwesto sa Final Four sa ligang inorganisa ng Sports Vision katuwang ang Shakey’s at handog ng PLDT Home Ultera.
Tumaas na ang laro ni Alyssa Valdez at siya ngayon ang leading scorer sa liga bitbit ang 104 puntos, tampok ang 82 kills.
Makakatulong niya sina Jhoanna Maraguinot, Bea de Leon, Amy Ahomiro at Kim Gequillana para tumatag ang paghahabol ng kampeonato sa liga.
May 2-2 baraha ang Lady Chiefs at sina Menchie Tubiera, Carmina Aganon at Danna Henson ang mga magtutulung-tulong para pigilan ang Ateneo at palakasin ang paghahabol ng upuan sa susunod na round.
Hawak ng UST ang 3-1 karta at kasalo ngayon ang National University Bulldogs at nagdedepensang kampeon FEU Lady Tamaraws.
Galing ang Tigresses sa five-sets panalo laban sa Arellano at sina Pamela Lastimosa, Marivic Meneses, Ennajie Laure at Chlodia Cortez ang mga kakamada para kay coach Emilio Reyes Jr. upang tumatag ang kapit sa ikalawang puwesto.
- Latest
