MANILA, Philippines - Isa lamang sa Mapua Cardinals at FEU Tamaraws ang magpapatuloy ng kampanya sa Spikers’ Turf Collegiate Conference matapos ang aksyon ngayon sa The Arena sa San Juan City.
Sa ganap na ala-1 ng hapon maglalaban ang Cardinals at Tams para sa huling upuan na aabante sa quarterfinals sa Group A sa ligang inorganisa ng Sports Vision at handog ng PLDT Home Ultera.
Parehong may 1-3 karta ang Mapua at FEU at ang matatalo ay mamamaalam na katulad ng UE Warriors na hindi pa nakakatikim ng panalo matapos ang apat na laro.
Liderato sa Group A ang paglalabanan ng Emilio Aguinaldo College Generals at National University Bulldogs sa ikalawang laro dakong alas-3 ng hapon habang magandang pagtatapos sa di makinang na kampanya ang pag-aagawan ng Arellano Chiefs at La Salle-Dasma Patriots sa alas-5 ng hapon.