MANILA, Philippines - Labanan ng dalawang manlalaro na tiningala sa Visayas sa galing sa beach volley ang maglalaban sa PLDT Home Ultera Philippine SuperLiga Beach Volleyball Challenge Cup 2015 na handog ng Smart Live More bukas sa Sands By The Bay sa SM Mall of Asia.
Si Fiola Ceballos ng Foton Tornadoes at Danica Gendrauli ng Gilligan’s ang magsusukatan dahil ang kanilang mga koponan ang pumasok sa women’s beach volley finals.
Ang laro ay ipapalabas ng live sa TV5 at tiyak na dudumugin ito dahil sa galing ng dalawang magtatagisan.
Si Ceballos ay isang 20 anyos na kinilala rin bilang kampeon sa unang edisyon ng Queen of the Sands.
Makakasama niya si Patty Orendain ng Bacolod sa hangaring kilalanin bilang kauna-unahang kampeon sa ligang inorganisa ng Sports Vision.
Hindi pahuhuli si Gendrauli na bigatin mula Southwestern University at maipaghiganti ang pagkatalo kay Ceballos noong 2012 at 2013 ang isa niyang motibasyon sa tagisan.