Heavy Bombers target ang ikatlong sunod na panalo no. 2 spot pag-aagawan ng Altas at Red Lions
MANILA, Philippines – Magkakasukatan ngayon ang mga ipinapalagay na puwedeng magtuos sa kampeonato na San Beda Red Lions at Perpetual Help Altas sa 91st NCAA men’s basketball sa The Arena sa San Juan City.
Ganap na alas-4 ng hapon magsisimula ang tagisan at ang mananalo ay magsosolo sa ikalawang puwesto.
Unang magsusukatan ang St. Benilde Blazers at Jose Rizal University Heavy Bombers sa alas-2 ng hapon at pakay ng huli ang ikatlong sunod na panalo.
Solo sa itaas ang Letran Knights sa bitbit na 5-0 karta, habang ang Red Lions, Altas at Arellano Chiefs ay magkakasalo sa ikalawang puwesto sa hawak na 4-1 baraha.
Ang mga kabiguan ng five-time defending champions na San Beda at Perpetual ay kanilang nalasap sa kamay ng Letran.
Nakabawi na kahit paano ang Red Lions dahil nanalo sila sa sumunod na dalawang laro laban sa Lyceum Pirates (97-74) at sa St. Benilde Blazers (73-67) para sa pagharap sa Altas, nakalasap ng 71-79 pagkatalo sa Knights sa huilng asignatura.
“We had a brief rest after playing back-to-back games and I hope that will help as to be physically and mentally prepared for Perpetual,” wika ni San Beda coach Jamike Jarin.
Si Ola Adeogun ay makikipagtulungang muli kina Arthur dela Cruz, Ryusei Koga at Dan Sara para sa Red Lions.
“Mahalaga itong laro na ito. Galing kami sa talo at ang defending champion ang sunod na laro namin. Makikita rito kung hanggang saan kami,” wika naman ni Altas coach Aric del Rosario.
Si Earl Scottie Thompson ang siya pa ring sasandalan ng koponan.
- Latest
