ORLANDO, Florida – Aminado ang Oklahoma City Thunder na nahirapan silang manalo sa labas ng kanilang balwarte ngayong season.
Ngunit ang kanilang inilaro laban sa Magic ang magiging unang hakbang para mabago ito.
Nagtala si Kevin Durant ng 21 points, 11 rebounds at 8 assists para imando ang Oklahoma City sa 127-99 paggiba sa Orlando.
Tumapos si guard Russell Westbrook na may 17 points at 6 assists, habang nagdagdag ng tig-16 markers sina Serge Ibaka at Dion Waiters.
Hindi naghabol ang Thunder sa Magic na kanilang tinambakan ng 38 points para wakasan ang kanilang four-game road losing streak.
Sa Toronto, tinalo ng New Orleans Pelicans ang Raptors, 95-93, mula sa isinalpak na driving layup ni Tyreke Evans sa natitirang 1.6 segundo.
Kumamada si Evans ng 26 points kasunod ang 22 ni Alexis Ajinca para sa panalo ng Pelicans na naglaro nang wala sina injured starters Anthony Davis (left foot) at Jrue Holiday (right ankle).
Sa San Antonio, tumipa si Tiago Splitter ng 14 points, habang nagtala si Kawhi Leonard ng 12 points at 9 rebounds para ihatid ang Spurs sa 89-69 panalo laban sa Utah Jazz.
Nag-ambag si Tim Duncan ng 11 points sa loob ng 23 minuto para sa San Antonio, nakamit ang kanilang pangatlong sunod na panalo, kasama ang dalawa nang magbalik si Leonard sa lineup.
tumipa naman si Rudy Gobert ng 13 points at season-high 18 rebounds sa panig ng Utah.