Karibal sina Melecio at Dyke Nieto bumabandera sa UAAP Jrs. MVP award

MANILA, Philippines – Asahan ang mahigpi­tang labanan para sa 77th UAAP juniors MVP nang tatlong manlalaro ang lu­mabas na may malaking tsan­sa na mapanalunan ang nasabing individual award.

Si Mike Nieto ng Ateneo Blue Eaglets ang nakakuha ng unang puwesto matapos ang pitong laro ngunit na­kadikit sina Aljun Melecio ng De La Salle Zobel  Ju­nior Archers at Mark Dyke ng National University Bullpups.

Nakalikom si Nieto ng 69.8571 Total Statistical Points at nagmula ito sa 384 statistical points at 105 Bo­nus Points.

Naghatid ang sentro ng Blue Eaglets ng 15 points, 10 rebounds at 2.5 assists para tulungan ang koponan sa 7-0 marka.

Sina Melecio at Dyke ay magkasalo naman sa ika­lawang puwesto ta­ngan ang magkatulad na 67.4286 TSP.

Lumabas si Melecio bi­lang No. 1 sa scoring sa kanyang 16.4 points at si­yang may pinakamagandang all-around stats matapos ang unang ikutan sa kanyang 6.0 rebounds, 6.0 assists at 1.7 steals para ila­gay ang Junior Archers sa ikatlong puwesto sa 5-2 ba­raha.

Nasa ikalawang upuan ang nagdedepensang Bullpups sa 6-1 karta at si Dyke ang pangunahing pu­wersa ng koponan sa ibinibigay na 14.3 points, ang na­ngungunang 13.2 rebounds at 1.7 assists.

Naunsiyami ang ha­nga­rin ng NU na palawigin ang pagpapanalo sa liga nang matapos sa 22-game winning streak mula sa 64-66 pagkatalo sa Ateneo sa pagtatapos ng first round noong Sabado.

Ang kakambal ni Mike na si Matt Nieto ang nasa ika­apat na puwesto ta­ngan ang 62.5714 TSP, ha­bang si Joaquin Banzon ng DLSZ ang nasa ika-li­mang puwesto sa kanyang 55.5714 TSP.