Fernandez at Barriga umentra sa semis

INCHEON, Korea – Tu­miyak si bantamweight Ma­rio Fernandez ng bronze medal matapos do­­minahin si Shiva Thapa ng India, 3-0, sa men's bo­xing competition ng 17th Asian Games kahapon sa Seohak Gymnasium dito.

Solidong mga suntok ang naikonekta ng 21-an­yos na si Fernandez, ang 2013 Southeast Asian Games gold medalist, kay Tha­pa para makipagkita kay Zhang Jiawei ng China sa semifinal round.

Hindi umubra ang atake ng 20-anyos na si Thapa, ang bantamweight winner no­ong 2013 Asian championships sa Amman, Jordan, matapos tumanggap si Fernandez ng mga iskor na 30-27, 29-28, 30-27 pa­ra sa kanyang unanimous decision victory.

Nagtala naman ang 25-anyos na si Zhang, ang silver medalist noong 2010 Asian Games sa Guangzhou, China, ng 3-0 panalo kontra kay Omurbek Malabekov ng Uzbekistan.

Maglalaban sina Fer­nan­dez at Zhang sa semifi­nals bukas kasabay ng upa­­kan nina lightweight Char­ly Suarez at Obada Mo­hammad Mustafa Alkabesh ng Jordan.

Nagposte rin ng pana­lo si light flyweight Mark An­thony Barriga laban kay Ha­sanboy Dusmatovov ng Uzbekistan, 3-0, papasok sa semis para makatiyak ng bronze medal.

Susubukan naman ni­na middleweight Wilfredo Lo­­pez na makaabante sa se­mis.

Lalabanan ng 29-anyos na si Lopez, tinalo si Iraqi Ab­dulridha Waheed noong Lu­nes, si Shinebayar Nar­man­dakh ng Mongolia sa quar­terfinals.