Laro Ngayon
(The Arena, San Juan City)
2 p.m. PLDT Home Telpad vs Air Force
4 p.m. NU vs Army
6 p.m. Ateneo vs Cagayan
MANILA, Philippines - Lalapit ang PLDT Home Telpad Turbo Boosters at ang Army Lady Troopers sa puwesto sa semifinals sa pagpanalo sa kanilang magkahiwalay na laro sa quarterfinals ng Shakey’s V-League Season 11 Open Conference ngayon sa The Arena sa San Juan City.
Parehong may 7-2 karta para pangunahan ang liga, ang Turbo Boosters ay katapat ang Air Force Raiders sa alas-2 ng hapon bago sundan ng Lady Troopers laban sa National University Lady Bulldogs sa alas-4.
Palalakasin pa ng Ateneo Lady Eagles ang kampanya para sa puwesto sa Final Four kung mananalo sa nagdedepensang Cagayan Valley Lady Rising Suns sa huling laro sa alas-6 ng gabi.
May posibilidad na matapos na ang tagisan para sa semis slot sa ligang inorganisa ng Sports Vision at handog ng Shakey’s bukod sa ayuda ng Accel at Mikasa.
Mangyayari ito kapag nanalo ang Raiders at ang Lady Rising Suns para hagipin ang kanilang ika-pitong panalo.
Kapag nangyari ito, ang dalawang collegiate teams na Lady Eagles at Lady Bulldogs ay mamamaalam na dahil hindi na sila aabot sa pitong panalo kahit walisin pa ang huling mga laro.
Crossover semifinals ang mangyayari at ang No. 4 team ang siyang makakatapat ng PLDT kung hawakan nila ang unang puwesto matapos ang single-round robin.