Bobcats sinakmal ang playoff ticket

CLEVELAND -- Nakamit ng Charlotte Bobcats ang kanilang ikalawang playoff seat sa franchise history.

Umiskor si Al Jefferson ng 24 points, kasama rito ang pito sa overtime, para tu­lungan ang Bobcats sa 96-94 paggupo sa Cleveland Cavaliers.

Ito ang ikalawang pag­ka­kataon na nakapasok ang Charlotte (39-38) sa playoff sa kanilang 10-year history at unang pagkakataon sapul noong 2010.

Habang nagdiriwang ang Bobcats ay nalagay naman sa panganib ang tsansa ng Cavaliers (31-47) sa playoff  sa kabila ng iniskor na career-high 44 points ni Kyrie Irving.

Ang Cleveland ay nasa ilalim ng eighth-place na Atlanta ng tatlo at kalaha­ting laro sa karera para sa playoff spot sa Eastern Con­ference.

Sa Washington, dinomi­na ng Chicago Bulls ang la­ro mula umpisa hanggang ka­tapusan para kunin ang 96-78 panalo kontra sa Wi­zards.

Ito ang unang panalo ng Chicago sa Washington sa kanilang tatlong beses na paghaharap ngayong sea­son.

 Muling magkikita ang Bulls at ang Wizards sa isang seven-game series sa playoffs.

Umiskor si D.J. Augustin ng 25 points, tampok ang 6-of-11 sa 3-point range.

Humakot si cen­ter Joakim Noah ng 21 points at 12 rebounds.