MANILA, Philippines - Isang bagong gym ang naghihintay para kay Manny Pacquiao sa Los Angeles sa pagsisimula ng kanyang training para sa susunod niyang laban na maaaring sa Abril 12 sa Las Vegas at inayos na ni Freddie Roach ang isang closed-door sessions.
Ang bagong pasilidad ay matatagpuan sa ground floor ng isang strip mall sa Vine Street sa Hollywood.
Ito ay isang dating laundromat hanggang mabili ni Roach ang naturang 1,500 square-foot property.
Sinabi ni Roach inalok niyang bilhin ang buong strip mall, ngunit ayaw pumayag ng may-ari.
Ang nasa itaas ng daÂting laundromat ay ang Wild Card Gym na binuksan ni Roach noong 1994.
Ang entrance sa Wild Card Gym ay nasa likuran ng strip mall.
Lumawak na ang Wild Card Gym sa 3,000 square feet kung saan mayroon itong dalawang boxing rings at mga training equipment mula sa heavy bags hanggang sa speedballs, treadmills at double-end bags.
Marami ring mga salamin dahil gusto ng mga shadow boxers na makita ang kanilang sariling ginagawa ang routine nila.
Ang larawan ng mga boksingero ay makikita sa pader.
At ang pinakaprominenteng fighter na produkto ng nasabing gym ay si Pacquiao.
Sinabi ni Roach na binili niya ang laundromat space para kay Pacquiao at iba pang kliyenteng gustong magsanay ng eksklusibo.
Ayon kay Roach, magsasanay si Pacquiao sa naturang gym para sa kanyang susunod na laban Los Angeles.