NEW YORK--Sa Hulyo 10 pa magiging opisyal ang paglalaro nina Kevin Garnett at Paul Pierce sa Brooklyn Nets, ngunit hindi na makapaghintay ang mga fans ng koponan.
Nang mahugot ng Nets sina Garnett at Pierce mula sa Boston Celtics ay nakakuha sila ng bagong attitude, shooting at athleticism.
Sa kanilang maiden season, nagtala ang Brooklyn ng 49 panalo at nakapasok sa playoffs sa likod nina Deron Williams, Joe Johnson at Brook Lopez.
Subalit hindi sila umabot sa second round.
Sa tulong nina Garnett at Pierce, inangkin ng Celtics ang limang sunod na Atlantic Division titles, nakarating sa dalawang finals appearances at sumikwat sa 2008 championship.
Sa kabila ng pagiging 37-anyos ni Garnett at pagiging 36-anyos ni Pierce, pinalakas pa rin nila ang Nets’ lineup.
Si Pierce ay epektibo pang scorer mula sa kanyang mga averages na 18.6 points at 4.8 assists per game sa nakaraang season.
Si Garnett ang isa sa pinakamahusay na jump-shooting big men bukod pa sa kanyang pagiging solidong post scorer.