Laro Ngayon
(Xavier School Jacinto Tiu Competition Court)
2 p.m. Lourdes-Manda vs La Salle-GH
MANILA, Philippines - Nangibabaw ang Lourdes School of Mandaluyong at La Salle Greenhills sa mga nakatapat para selyuhan ang pagkikita para sa kampeonato sa Seaoil NBTC 12U National Championship ngayon sa Jacinto Tiu Competition Court sa Xavier School.
Gumawa ng 24 puntos si Alejandrio Pangan habang may panuportang 15 puntos si Vincent Reguero para sa Lourdes School na nalusutan ang Escuela de Sophia ng Caloocan, 65-62, sa semifinals.
Sina Andrei Carino, Christopher Perio at Saymond Male ay may 22, 15 at 11 para sa natalong koponan.
Apat na manlalaro ng La Salle-Greenhills ang kumamada para sa madaling 73-44 tagumpay sa Ateneo de Manila University.
Samantala, nagsimula na ang botohan para sa Seaoil NBTC 12U Elite Training Camp na gagawin mula Mayo 21 hanggang 23.
Ang mangungunang 40 manlalaro ang makakasama sa Camp na hahawakan ng mga batikang coaches sa Philippine basketball katuwang ni program director Eric Altamirano at camp facilitator Alex Compton.