Gamboa bagong PNSA president

MANILA, Philippines - Inihalal si Ret. Col. Danilo Gamboa bilang bagong pa­­ngulo ng Philippine National Shooting Association (PN­SA) matapos ang eleksyon kahapon sa kanilang tang­gapan sa Philsports Complex sa Pasig City.

Nauwi sa unanimous decision ang pagkapanalo ng 75-anyos na si Gamboa nang umatras ang naunang ka­tunggali na si Ildefonso Tronqued Jr. na chairman ng da­ting administrasyon.

Si Gamboa ang secretary-general ni dating PNSA president Dr. Mikee Romero na nagpasyang huwag nang tumakbo sa halalan.

Sina Roland Doncillo (vice-chairman) at Maria Mar­cia Cleofas (VP For Internal Affairs) ang iba pang ba­lik-opisyal ng PNSA, habang ang iba pang binigyan ng puwesto mula sa 15-board na nanalo sa halalang gi­na­wa noong Marso 23 ay sina Gabriel Tong (chairman), Ri­chard Fernandez (VP For National Affairs), Raymond Lim­caco (treasurer) at Emerito Concepcion (corporate sec­retary).

Si Aristotle Viray ang inilagay bilang secretary-general.

“This is a unified board dahil halos ang limang aggru­pations ay represented sa officers,” sabi ni Gamboa na nag­silbing national player mula 1977 hanggang 1983 at nanalo ng pilak sa rapid fire noong 1983 Singapore SEA Games.

Una niyang pagtutuunan ay ang pamamahala ng Pi­lipinas sa Southeast Asian Shooting Association (SEA­SA) Championships.

Magtutungo si Gamboa patungong Malaysia para kausapin ang SEASA at Malaysia Shooting Association president Ally T. H. Ong at hilingin na iurong ang hosting da­hil sa pagkakaroon ngayon ng gun ban para sa pagda­raos ng SEA Games sa Myanmar.