Bryant nanalasa sa Lakers

LOS  ANGELES--Umis­­kor si Kobe Bryant ng 40 points, habang nag­tala naman si Dwight Howard ng 19 points at 16  rebounds para tulungan ang Los Angeles Lakers sa 111-107 panalo kontra sa Portland Trail Blazers noong Biyernes ng gabi.

Humugot si Bryant ng 11 points sa huling 5:30 minuto at nakamit ng La­kers ang kanilang pang-pitong panalo sa huli nilang 10 laro.

Nagdagdag si Antawn Jamison ng 16 points mula sa bench para ipalasap sa Portland ang season-worst nitong pang-pitong dikit na kamalasan.

Natalo ang Trail Blazers sa kanilang limang road games at 10 sa kanilang huling 11 asignatura sa la­bas ng Rose Garden.

Nagposte si J.J. Hickson ng 22 points at 11 rebounds para sa Portland, habang tumipa din ng 22 markers si Nicolas Batum at tumapos si two-time All-Star LaMarcus Aldridge na may 15 points.

Sa Oklahoma City, nagbida sina All-Star Russell Westbrook at Kevin Durant para ipanalo ang Oklahoma City Thunder, 127-111, kontra sa Minnesota Timberwolves.

Tinapos ng Thunder ang kanilang three-game losing slump.

Nagposte si Westbrook ng season-high 37 points, ha­bang nag-ambag ng 27 si Durant para sa Oklahoma City, naiwasan na matalo ng apat na sunod sapul noong Abril ng 2009.

Nagdagdag din si Westbrook ng siyam sa kabu­uang 28 assists ng Thunder.