MANILA, Philippines - Masasabing ang Syria lamang ang madaling asignatura ng Pilipinas sa gagawing laban sa Asia-Oceania Zone Group II Davis Cup sa 2013.
Ang Pilipinas ang siyang tatayong host sa first round na itinakda mula Pebrero 1 hanggang 3. Sa magarbong Plantation Bay sa Cebu gagawin uli ang Davis Cup at pinapaboran ang nationals na makakaalpas sa hamon ng dayuhang bansa.
Galing sa Group III ang Syria at unang beses nilang makakasukatan ang Pilipinas na di hamak na mas beterano kung kalidad ng mga katunggali ang pag-uusapan.
Matapos ito ay dadaan na sa butas ng karayom ang paghahabol para mabalik sa Group I sa 2014.
Malaki ang posibilidad na ang Thailand ang sunod na makaharap ng Ph Cuppers dahil unang kasukatan nila ay ang Kuwait.
Ang second round tie ay gagawin sa Abril 5 hanggang 7 at ang mananalong bansa ay aabante sa finals na itinakda mula Setyembrre 13 hanggang 15.
Kung suwertehin pa ang Pilipinas, maaaring ang malakas na New Zealand ang kanilang makatapat sa huling laban para sa puwesto sa Group 1.
Unang laro ng New Zealand ay ang Lebanon na gagawin sa kanilang lugar.
Ang sunod na laro ng mananalong koponan ay ang magwawagi sa pagitan ng Pakistan at Sri Lanka.
Sa ngayon ay hindi pa alam kung sino ang bubuo sa national team pero hindi malayong sina Fil-Ams Treat Huey at Ruben Gonzales ang magmamando sa koponan.
Sa unang linggo ng Enero ay inaasahang magpupulong ang pamunuan ng Philippine Tennis Association (Philta) upang agad na malaman ang mga dapat gawin nang sa gayun ay makalaro muli ang Pilipinas sa Group 1.