88TH NCAA Women’s Volleyball Lady Altas pinirata ang Pirates

MANILA, Philippines - Hindi pa rin nagbabago ang tikas ng laro ng nagde­depensang kampeon na University of Perpetual Help sa 88th NCAA volleyball na kahapon ay nagdaos ng laro sa The Arena sa San Juan City.

Nagtambal sa kabu­uang 39 puntos ang mga pambatong sina Honey Royse Tubino, Sandra delos Santos at April Anne Sartin upang ibigay sa Lady Altas ang 25-14, 25-16, 25-21, panalo laban sa Lyceum sa women’s division.

Kinapos lamang ng isang minuto ang laban pa­ra umabot ng isang oras at ang magkasunod na kills nina Sartin at Norie Jane Diaz ang tumapos sa pagsusumikap ng Lady Pi­rates na makatikim ng isang set na panalo tungo sa 3-0 sweep ng Perpetual.

May 11 kills at 2 blocks si Tubino, 9 attack points ang hatid ni Sartin habang apat na service aces at dalawang blocks ang naibigay ni Delos Santos at ang Lady Altas ay umabante sa 4-0 at 18-0 kung isasama ang sweep tu­ngo sa kampeonato no­ong nakaraang taon.

Ito ang ikaapat na sunod na pagkatalo ng Lady Pirates na humugot lamang ng puntos sa limang man­lalaro sa pangunguna ni Analee Paredes sa kanyang pitong puntos.

Isa sa naitalang 14 puntos ang nangyari sa kills pa­ra kay Jay Dela Cruz upang bitbitin ang Altas sa kanilang ikaapat na sunod na panalo sa 25-18, 25-19, 25-19, panalo sa Pirates.

May 13 puntos si Edmar Sanchez, 11 ang ibinigay ni Adam Daquer, tampok ang 5 blocks, habang 10 ang kay Ralph Savellano pa­ra ma­ipagpatuloy ng Altas ang hindi pagbibigay ng set win matapos ang apat na na­katunggali.

Sinungkit naman ng 22-time women’s champion San Sebastian ang ika­lawang panalo matapos ang tatlong laro sa pama­ma­gitan ng 25-11, 25-15, 25-17, panalo sa Mapua na tumagal lamang ng 46 mi­nuto.

Nakumpleto ang pamamayagpag ng Baste nang humataw ang Stags ng 25-20, 25-18, 25-19, tagum­pay sa men’s division.