MANILA, Philippines - Ipinagpatuloy ng nagdedepensang champion Philippine Merchant Marine School at Rizal Technological University ang kani-kanilang pagpapasikat sa 20th National Capital Region Athletic Association (NCRAA) men’s basketball tournament.
Sumandig ang Mariners sa mainit na laro sa second period at nakakuha pa ito ng sapat na lakas mula kay Dan Reverente nang gulatin ang La Salle-Dasmariñas Patriots, 85-60 sa Rizal Memorial Technological University gymnasium sa Mandaluyong City.
Sa iba pang laro, isinalpak ni rookie Elias Sarona ang winning basket sa huling 10 segundo ng labanan para iligtas ang RTU Blue Thunder sa 74-72 tagumpay kontra Emilio Aguinaldo College-Cavite Vanguard.
Ang pagbibidang ito ni Sarona ang naghatid sa Blue Thunder sa ikatlong panalo matapos ang apat na laro at umakyat sa ikalawang puwesto sa likod ng Mariners.
Inilista naman ng PMMS Mariners ang kanilang ikaapat na sunod na panalo sa cagefest na ito na suportado ng Mikasa at Molten Balls.
Bumandera ang bagitong si Elvin Chan sa Mariners na may 16 puntos.