Comelec, sinopla ang PNP sa ‘Oplan Katok’
TAMA lamang na tutulan ni Commission on Election chairman George Erwin Garcia ang balak ng Philippine National Police (PNP) na ‘Oplan Katok’ sa mga nagmamay-ari ng ‘di-lisensiyadong baril. Sa pamamaraan kasing ito madaling matutumbok ng mga pulis ang mga baril na walang lisensiya.
Tinutulan ng Comelec ang balak dahil maaring personalin ng mga pulis ang pagsuyod ng mga baril lalo na sa mga kalaban ng pulitiko na kasangga ng pulis. Magdurusa nang walang kalaban-laban ang mga kalaban ng pulitiko kapag tinaniman ito ng mga baril ng mga pulis.
May katwiran si Garcia dahil sa totoo lang hindi basta-bastang mailalabas ng mga tahanan ang mga baril kung wala itong permiso mula sa kanilang ahensiya.
Ang may karapatan lamang na magdala ng baril sa labas ng mga tahanan ay mga pulis at sundalo na naka-duty at may exemption permit mula sa Comelec. Kaya hindi na kailangan ang ‘Oplan Katok’ gaya ng balak ng PNP.
Ang dapat gawin ng PNP ay paigtingin ang sinasagawang check point nito sa lahat ng kalsada sa buong bansa upang malambat ang mga nagdadala ng baril na walang permiso mula sa Comelec.
Sa totoo lang maraming baril ang mga pulitiko sa kanilang armory. Marami ring goons ang mga dayukdok na pulitiko na gagamitin para maghasik ng gulo sa darating na May 2025 elections. Buburahin ng goons ang mga kalaban sa pulitika para sila na ang maghari.
May mga listahan na rin umano ang PNP na mga hot spot na lugar at may mga pulis nang ipakakalat para magbigay ng seguridad sa May elections.
Samantala, itinuloy na ng Comelec ang pag-imprenta ng mga balota kahapon. Matatandaan na ipinatigil ng Supreme Court ang pag-imprenta ng balota at inutusan ang Comelec na isama ang pangalan ng limang kandidatong inalis sa unang dineklarang nuisance candidate. Ang pagkakatigil sa imprenta ng mga balota ay naging dahilan para masayang ang P150 milyon.
Ang laking pera nito. Sana nagamit ito para sa mga mahihirap na kababayan. Hindi na sana maulit ang nangyari.
Ang hindi maganda, makaraang sabihin ng SC na isama ang pangalan ng lima, mayroong nag-withdraw. Atras na raw sa pagtakbo.
Linawin sanang maigi ng Comelec sa SC ang lahat para hindi masayang ang pera sa pag-imprenta ng mga balota. Naghihikahos pa naman ang bayan at maraming nagugutom!
- Latest
