Taiwanese doktor, nag-viral matapos gawan ang sarili ng vasectomy bilang regalo sa asawa

ISANG plastic surgeon mula sa Taiwan ang umani ng atensiyon sa social media matapos magbahagi ng video kung saan siya mismo ang gumawa ng vasectomy sa kanyang sarili bilang simbolikong regalo para sa kanyang asawa.

Si Dr. Chen Wei-nong, isang plastic surgeon at ama ng tatlong anak mula sa Taipei City ay nag-trending matapos i-post sa Facebook at Instagram ang kakaibang proseso.

Ayon kay Chen, ginawa niya ito upang mawala ang pag-aalala ng kanyang asawa ukol sa posibleng pagbubuntis.

Upang siguraduhin ang tagumpay ng operasyon, nagdesisyon siyang siya mismo ang gumawa nito, na nakunan pa ng video para sa educational purposes.

Ibinahagi ni Chen ang 11 hakbang sa nasabing operasyon. Gumamit siya ng anesthesia bago simulan ang proseso. Dahil hindi ­pangkaraniwan ang mag-opera sa sariling katawan, ang dapat sana’y 15 minutong operasyon ay umabot ng isang oras. Gayunman, matagumpay naman itong natapos.

“Itinakda kong tapusin ito nang maayos. Bagamat kakaiba ang pakiramdam ng paghawak at pag-opera sa sariling urethra, mas madali ang operasyon sa kalalakihan kumpara sa fallopian tube surgery ng kababaihan,” pahayag ni Chen sa kanyang followers.

Sa kabila ng papuri para sa kanyang tapang, pagmamahal sa asawa, at kahusayan, may mga nag-alala sa kaligtasan ng self-performed procedure.

Nilinaw naman ni Chen na siya ay lisensyadong surgeon at ginawa ang ­operasyon sa labas ng oras ng trabaho, sa ilalim ng gabay ng isang urologist.

Gayunman, pinaalalahanan niya ang publiko na huwag siyang gayahin at magtungo na lamang sa kuwalipikadong doktor.

Matapos ang operasyon, nakaranas si Chen ng kaunting pananakit at discomfort sa unang gabi, ngunit maayos na ang kanyang pakiramdam kinaumagahan.

Tinagurian siyang “Pinakamatapang na lalaki sa Taiwan” ng mga netizen dahil sa kanyang ginawa.

Ayon naman sa paunang imbestigasyon ng Department of Health ng Taipei, walang nilabag na batas si Chen, bilang isa siyang kuwalipikadong manggagamot na nagsagawa ng procedure sa sarili niyang katawan.