Panalangin para sa mahusay na leader

KAILANGAN ng Inang-Bayan ang isa matinong leader upang pagkaisahin ang mamamayan na tumulong sa pagpapaunlad ng bansa. Ilan taon nang tila nawala ang pagkakaisang ito kaya lumapit tayo sa mapagpalang Diyos at buong pagpapakumbabang magkaisa sa panalangin:

Mahal na Ama, itulot mo na sa malapit na hinaharap ay pagkalooban mo kami ng isang mahusay na mamumuno sa aming bansa. Isang leader na hindi pumapatay o nagna­nakaw. Isang pinuno na mapanghikayat sa gawaing mabuti upang ang lahat ay maging bahagi ng pambansang pagsisikap na umigi ang Inang-Bayan. Isang leader na hindi nakikipagkutsaba sa mga alagad ng kadiliman. Itulot mo na ang taong ito’y may banal na takot sa iyo.

Hindi umaalipusta kundi nagbibigay papuri sa iyong Ngalan. Gawin mo po siyang isang leader na inspiration sa taumbayan at hindi umuobliga sa mga mamamayan na bulag na sumunod sa lahat ng gusto niya.

Sana, o Diyos, naisilang na ang taong ito at naghihintay­ na lang ng iyong bendisyon at pagtatalaga upang siya ang mamuno sa bansang sabik na sa totoong pag-unlad. Tulungan mo po kaming mga mamamayan upang matukoy sa hanay ng mga kandidato ang nararapat naming piliin.

Higit sa lahat, mapawi sana sa puso ng taumbayan ang politics of idolatry na bulag sa masasamang ginagawa ng pulitikong kanilang dinidiyos. Ang lahat nang ito ay samo namin sa pangalan ni Hesukristong aming Manunubos at Panginoon.