Mga dahilan kung bakit numinipis ang buhok

TINATAYANG 100,000 hanggang 150,000 buhok ang nasa anit. Ang 10-20 percent nito ay puwedeng malagas, kaya 50-100 buhok ang nalalagas araw-araw.

Ang isa sa mga pangunahing dahilan kung bakit nalalagas ang buhok ay ang pagbabago ng hormones. Ang receding hairline ay maaaring unti-unti o mabilis. Mayroon ding male pattern ng pagnipis ng buhok dahil nasa lahi o namamana.

Mayroon ding female pattern ng pagnipis ng buhok kung saan numinipis lang ang buhok pero hindi umuurong. Dahil sa pabagu-bago ng hormones kaya nalalagas ang buhok tat­long buwan pagkapanganak.

Ang iba pang sanhi ay menopause, pagtigil ng birth control pills sa loob ng isa hanggang tatlong buwan, pag-edad, mga stress tulad ng namatayan, naaksidente, problema, pagod at sakit tulad ng sa thyroid.

Ang iba pang dahilan ay kakulangan sa nutrisyon, kulang sa protina, laging gutom o nagdidiyeta.

Para malaman kung hindi normal ang hairfall ay kumuha ng magnifying glass at tingnan ang mga buhok. Pag nabali o hair shaft breakage ang dahilan, mayroon puwedeng gawin tulad ng pagiging gentle o maingat sa buhok, bawasan ang sobrang pag-brush, pag-shampoo o pagtali.

Huwag ipamasahe ang anit dahil baka mabali ang buhok. Wala munang kemikal tulad ng hair dyes, bleaching, pang­kulot o pang-unat. Puwedeng gumamit ng mga protein con­ditioners at cream rinse.

Pangalagaan ang hair roots sa pamamagitan ng pag-iwas sa braid at mahigpit na ponytail. Iwas din sa maiinit na rollers.

Kapag patse-patse ang pagkakalbo, dahil ‘yan sa sakit sa balat o fungal infection tulad ng ringworm. Ang ringworm ay fungal infection, korteng bilog ang pagkalagas ng buhok, mapula ang balat, nagbabalat, at makati. Ma­dalas ito sa mga bata, galing sa alagang aso, pusa o kalaro. Kumunsulta sa dermatologist para bigyan ng anti-fungal cream tulad ng ketoconazole.

Mayroon ding Trichotillomania (hair pulling disorder) kung saan naging ugali na laging hinihila o binubunot ang buhok.