Noong Marso 2022, itinalaga ni dating Pres. Rodrigo Duterte si Atty. Alberto A. Bernardo bilang isa sa mga komisyoner ng Napolcom, na kumakatawan ang civilian sector, para sa anim na taon, kapalit ni Vitaliano N. Aguirre II. Siya rin ay itinalagang VCEO ng Napolcom. Bagaman maaring iba ang nakalagay sa rekord ni Bernardo, may mga ulat na nagsasabi na siya ay midnight appointee ni Duterte dahil ang kanyang appointment ay inanunsyo lampas-lampas na sa itinakdang deadline ng batas. Ayon sa artikulo ng Rappler noong Mayo 5, 2024, si Bernardo ay nag-optional retirement, na kinumpirma niya sa isang panayam. Lumabas sa talaan ng GSIS na si Bernardo ay nagretiro noong Nob. 1, 2023.
Sa pagtatanong at pag-verify mula sa GSIS, tinatanggap na ni Bernardo ang kanyang retirement benefits. Kaya mula Nobyembre 2023 hanggang kasalukuyan, hindi na tinatanggap ng GSIS ang kanyang life at retirement premiums, at ang kanyang lagda sa mga transaksyon ng Napolcom, sa GSIS ay hindi na rin kinikilala ng ahensiya. Ayon sa COA, ang rekord ni Bernardo sa Napolcom, ay nagpapahiwatig na siya ay nagretiro na at nahiwalay na sa serbisyo ng gobyerno. Sa hindi maipaliwanag na dahilan, sabay na natatanggap ni Bernardo and kanyang suweldo at pension.
Kung tunay na nagretiro si Bernardo, sa anong kapangyarihan at kadahilanan siya nagpapatuloy bilang Vice Chairperson at Executive Officer at bilang Komisyoner? Maaari pa ba siyang pumirma ng mga dokumento at pamunuan ang Komisyon? Ano ang moral authority ni Bernardo sa 220,000 katao ng Philippine National Police kung ginawa niya ito nang palihim upang i-circumvent ang mga batas sa civil service? Hindi ba’t ang public service ay public trust?
Ginoong Pangulo, umaasa kaming umabot ito sa iyong kaalaman. Alam namin na ang iyong puso ay handang lumaban sa kung ano ang tama at makatarungan. Binanggit mo sa iyong SONA na “ang masasama ay hindi kailangan ng anumang higit pa para tupdin ang kanilang mga layunin kung ang mga mabubuting tao ay mananahimik at hindi gagawa ng hakbang”.
Bukas ang kolum na ito sa anumang paglilinaw o komento.