EDITORYAL - Desenteng evacuation centers, kailangan na
![EDITORYAL - Desenteng evacuation centers, kailangan na](https://media.philstar.com/photos/2024/07/24/ed_2024-07-24_21-26-19.jpg)
May nakalimutan si President Ferdinand Marcos Jr. na banggitin sa kanyang ikatlong State of the Nation Address (SONA) noong Lunes, ito ay ang pagkakaroon nang maayos at permanenteng evacuation centers. Isa ito sa dapat iprayoridad ng pamahalaan sapagkat ang bansa ay lagi nang sinasalanta ng kalamidad. Taun-taon, mahigit 20 bagyo ang nananalasa sa bansa at ang mga ito ay mapanira. Madalas din ang pagbaha, pagputok ng bulkan at paglindol. Apektado ang mamamayan sa tuwing tumatama ang kalamidad. Wala silang masilungan sa oras ng pangangailangan.
Kahapon, sinalanta nang mala-Ondoy na baha ang Metro Manila at mga probinsiya sa Central, Southern at Northern Luzon dahil sa Bagyong Carina at habagat. Marami na naman ang nag-akyatan sa bubong ng kanilang bahay. Maraming ni-rescue lalo ang mga nakatira sa tabing dagat. Dinala sila sa evacuation centers na karamihan ay sa mga eskuwelahan at covered court ng barangay. Nagsiksikan na naman ang mga tao sa evacuation centers.
Sabi ng PAGASA, ngayon araw na ito lalabas ng bansa ang bagyo pero magpapatuloy pa ang pag-ulan dahil sa habagat. Nagbabala ang PAGASA na bukod sa baha, mag-ingat din ang mamamayan sa mga pagguho ng lupa. Kahapon, apat na miyembro ng pamilya ang naiulat na namatay sa Agoncillo, Batangas nang gumuho ang lupa at natabunan ang kanilang bahay.
Simula na ng pagdalaw ng mga bagyo sa bansa at inaasahang titindi dahil sa epekto ng La Niña na mararanasan sa susunod na buwan at tatagal hanggang Nobyembre. Ang La Niña ay nagdadala ng mga malalakas na pag-ulan, baha at pagguho ng lupa.
Ngayong nagsisimula na ang pagdalaw ng mga bagyo, malaking problema na naman ang evacuation centers na pagdadalhan sa mga nasalanta. Tuwing may kalamidad, malaking problema kung saan dadalhin ang evacuees. At dahil walang mapagpipilian, sa mga school dinadala ang evacuees. Ang problema, ginagamit ng mga estudyante ang schools. Masasakripisyo ang pag-aaralang mga bata kung gagamitin para sa evacuees.
Ang pagtatayo ng permanenteng evacuation centers ay nararapat nang isagawa ng kasalukuyang pamahalaan. Mahalaga ito sapagkat ang Pilipinas ay laging tinatamaan ng kalamidad.
Noong Nobyembre 2022, tinalakay ng mga mambabatas ang pagkakaroon nang permanenteng evacuation centers. Marami sa mga mambabatas ang sumang-ayon na dapat magkaroon sa bawat bayan ng evacuation centers. Pero lumipas ang ilang taon, walang evacuation centers na naitayo. Kaya, balik sa school ang evacuees.
- Latest