Nang sabihin ni VP Sarah Duterte na hindi siya dadalo ngayon sa State of the Nation Address (SONA) ni Presidente Bongbong Marcos at itatalaga ang sarili niya bilang “designated survivor”, maraming espekulasyon ang lumutang. Na baka Ito’y isang bomb threat na madadamay pati ang mga constitutional successors ng Presidente kabilang ang Senate President, House Speaker at Chief Justice.
Sa U.S. kasi, ang designated survivor ang awtomatikong papalit sa Presidente kung may masamang mangyayari rito at hindi na makagaganap sa tungkulin. Wala namang ganyang probisyon sa ating Konstitusyon. Pero kahit ano pa ang rason, kapag hindi na magampanan ng Presidente ang tungkuling mamuno, Vice President ang itatalaga sa puwesto niya. Matik iyan!
Pero paglilinaw ni Sara, ang sinabi niya ay hindi biro o banta. “Hindi rin ito bomb threat” dagdag niya. Kung hindi biro at banta, anong lohika ng sinabi niya.
Sinabi pa niya na kung hindi naunawaan nang marami ang statement niya ay hindi na siya magpapaliwanag pa. Seryoso ang interpretasyon nang marami. Nakasandal diyan ang pambansang seguridad.
Dapat nga siyang magpaliwanag sa talinghagang sinambit niya. Kung hindi, tiyak ang bawat magtipon sa session hall ng Batasan Pambansa ay kakabug-kabog ang dibdib.
Kahit hindi madamay sa ganitong senaryo ang mga constitutional successors ng Presidente, siguradong si Sara ang mauupong Presidente porke siya ang Bise.
Mrs. Vice, you owe it to the Filipino people to explain.