EDITORYAL - Mga batang pulubi dumarami!
NOONG nakaraang buwan, nagsagawa ng paglilinis sa lansangan ang Department of Social Welfare Development (DSWD) sa mga batang namamalimos sa kalye. Hinuli ang mga batang pulubi at maski ang mga matatandang namamalimos. Iglap na nawala ang mga batang sumasampa sa mga dyipni at nag-aabot sa mga pasahero ng libaging sobre. Ang ibang bata, kakatukin ang mga bintana ng kotse at manghihingi ng limos. Ang iba, pupunasan ang salamin ng kotse at saka ilalahad ang mga kamay. Kung anu-ano pa ang ginagawa ng mga batang pulubi para makahingi ng limos sa mga motorista.
Saglit lang nawala ang mga batang namamalimos at ngayon ay nagsibalikan na naman sa kalsada. Karaniwang mga batang Badjao ang namamalimos sa kalye at naglalambitin sa dyipni. Lubhang delikado sapagkat maari silang mahulog o kaya’y masagasaan. Kasalanan pa ng driver ng dyipni kapag nangyari ito. Ang driver pa ang makukulong at magdurusa.
Hindi lamang ang mga batang pulubi ang namumulaklak sa kalsada kundi pati na rin ang mga tinatawag na “batang hamog” na nambibiktima ng mga truck driver. Sa Road 10, Tondo, maraming batang hamog ang umaakyat sa mga truck at ninanakaw ang mga gamit at iba pang pakikinabangan. Kinukulimbat ang battery, tool box, at iba pang gamit. Walang kamalay-malay ang truck driver na nalimas na ang kanyang gamit.
Nagsisibalikan ang mga batang pulubi sa kalye at inaasahang darami pa habang papalapit ang Pasko. Nararapat na magsagawa pa ng puspusang paghuli ang DSWD sa mga batang pulubi at ganundin sa mga “batang hamog”.
Gawing regular ang paghuli sa mga batang pulubi at ilagay sa pasilidad kung saan ay magiging maayos ang kanilang kalagayan. Gawing puspusan ang pag-monitor sa mga kalye na tambayan ng mga batang pulubi.
- Latest
