EDITORYAL - Saklolohan ng DOLE ang underpaid nurses
NOON kapag sinabing sa private hospital nagtatrabaho ang nurse, kinaiinggitan. Kasi nga naman, private hospital at ang dating ay bigatin. Malaking ospital kaya maraming pasyente, kumpleto sa gamit, at kung anu-ano pa. Kaya maraming nurses noon ang gustong makapasok sa mga pribadong ospital para sikat. Kapag narinig ng kakilala o kaibigan na sa kilalang pribadong ospital nagtatrabaho, sasabihin “ay ang suwerte mo!’’
Pero hindi pala suwerte ang mapasok sa pribadong ospital dahil karampot ang suweldo rito pero sandamukal ang trabaho. Bukod sa mababa ang suweldo, hindi pa ibinibigay ang mga kaukulang benefits. Overworked pero underpaid ang mga nurses sa pribadong hospital.
Ayon sa report, maraming nurses sa private hospitals ang sumasahod lamang ng P9,000. At ang masaklap pa hindi binabayaran ang kanilang overtime. Atrasado rin ang mga benefits kahit na naisabatas na ang pagkakaloob nito sa lahat ng healthcare workers.
Mas malaking hamak ang suweldo ng mga nasa publikong hospital na ang suweldo ay P30,000. Sa ganitong sitwasyon, mas nakakainggit pala ang mga nurses sa public hospital kaysa private. Baliktad na ang kalagayan ngayon na mas maganda ang sitwasyon ng nurses sa publikong ospital kaysa pribado. Maganda lang pakinggan kung nagwo-worked sa private hospital pero ang totoo, gutom!
Ang kalagayan ng nurses sa private hospital ay damang-dama ngayong may pandemya. Kawawa ang kalagayan nila na tila nalilimutan na. Hindi masisisi kung sa mga susunod na buwan, wala nang nurses sa private hospital dahil nagbitiw na at nag-aaplay para magtrabaho sa ibang bansa. Mas sigurado ang kinabukasan nila sa ibang bansa sapagkat triple o mahigit pa ang suweldo nila roon kumpara sa mga ospital sa Pilipinas.
Ang nakaaawang kalagayan ng nurses sa private hospital ukol sa mababang suweldo ay nararapat nang panghimasukan ng Department of Labor and Employment (DOLE). Kung hindi aaksiyon ang DOLE sa kalagayan ng nurses, mauubos ang mga nasa pribadong hospital dahil nasa ibang bansa na. Pakialaman na ng DOLE ang problemang ito bago pa maging huli ang lahat.
- Latest
