EDITORYAL - Krisis sa pagkain babala ng DA

Agrikultural na bansa ang Pilipinas. Malawak­ ang mga taniman ng palay mapa-hilaga at mapa-timog. Palay ang numero unong produkto ng bansa at pinagkakakitaan nang maraming Pilipino. Maraming magsasaka ng palay ang nakadepende sa kanilang ani kaya pinagbubutihan nila ang pagtatanim. Gina­gastusan nila nang sapat ang pangangailangan­ ng kanilang pananim na palay para marami silang anihin. Binubusog nila sa fertilizer at pinuprotektahan sa mga kulisap sa pamamagitan ng regular na pag-spray ng insecticide. Hindi dapat pabayaan kapag namumu­laklak na ang palay sapagkat maaring maging ipa at walang mapapakinabangan. Kailangang gastusan ang tanim na palay para magkaroon nang maraming ani.

Noong nakaraang linggo, nakadidismaya ang si­nabi ni Agriculture Sec. William Dar na may napipinto­ umanong food crisis sa bansa dahil sa pagtaas ng presyo­ ng mga ginagamit sa pagsasaka gaya ng fertilizer, insecticide at mga binhi. Pinalala rin umano ito ng pandemya at ang patuloy na pagtaas ng petroleum products at ang nagaganap na digmaan sa pagitan ng Russia at Ukraine. Sinabi ni Dar na posibleng magkaroon ng food crisis sa ikalawang bahagi ng 2022.

Nakadagdag sa pagkadismaya ang sinabi naman­ ni Agriculture Undersecretary Fermin Adriano na nangangailangan ang bansa ng P30 hanggang P40 bilyon para sa sapat na suplay ng bigas. Binig­yang babala ni Adriano ang administrasyon ni presumptive president Ferdinand Marcos Jr. na hindi nila alam kung sasapat pa ang suplay ng bigas sa ika­la­wang bahagi ng taon. Kailangan daw ay magbigay ng ayuda sa mga magsasaka para may maibili ng fertilizer at kung hindi ay baka magkaproblema.

Nakakatakot ang babala ng DA. Mismong sa tang­gapan pa na namamahala sa agrikultura nanggaling na posibleng magkaroon ng krisis sa pagkain­. Dapat bang ganito ang ibukambibig ng mga namu­muno? Sa halip na mga paraan kung paano mapapa­rami ang ani ang ibuka ng bibig ay malaking pondo ang hinihiling. Sa halip na tulungan ang mga magsasaka ng palay para mapaunlad at maparami ang ani, ang pondo para sa ibibili ng bigas ang hinihiling.

Ang paghahayag ng DA na may krisis sa pagkain­ ay nag-aanyaya sa mga smuggler ng bigas, gulay, prutas, karne at maging isda. Nararapat maging­ ma­talino si Marcos sa pagpili ng Agriculture secre­tary. Hindi ‘yung ang utak ay pawang pag-angkat ng bigas ang nalalaman.