EDITORYAL - Tapos na ang kuwento
PINATALSIK ng mga kasamahang mahistrado si Supreme Court Chief Justice Maria Lourdes Sereno kahapon. Pinaboran ng siyam na associate justices ang quo warranto petition ni Solicitor General Jose Calida. Lima namang justices ang kumontra sa petisyon. Sa isang hiwalay na botohan, walo ang bumoto para tuluyang patalsikin si Sereno at anim ang kumontra.
Ang mga bumoto para mapatalsik si Sereno ay sina Justices Tijam, De Castro, Peralta, Bersamin, Jardeleza, Martires, Reyes at Gesmundo samantalang ang mga kontra ay sina Justices Carpio, Velasco, Del Castillo, Leonen, Bernabe at Caguioa.
Sa pagkakapatalsik kay Sereno, ang pagkaka-appoint niya bilang ika-24 na Chief Justice ng Korte Suprema noong 2012 ay pinawawalambisa. Inaatasan siyang ibakante ang posisyon. Pero sabi ng mga abogado ni Sereno, hindi pa tapos ang laban. Sabi naman ni Sereno, ilang minuto makaraang lumabas ang desisyon ng mga mahistrado, siya pa rin ang panalo. Hinikayat niya ang mga supporters na huwag matakot ipaglaban ang demokrasya. Hindi pa tapos ang kanyang pakikipaglaban.
Iba’t iba ang opinyon sa pagkakapatalsik kay Sereno. Masyado raw mabilis ang desisyon na parang may isang kamay na nagpapagalaw at nagpapaikot. Dapat daw hindi sa ganoong botohan dinaan ang pagpapatalsik sapagkat maaaring pagkaisahan ang Chief Justice. Dapat daw idinaan sa impeachment process gaya nang ginawa kay dating Chief Justice Renato Corona.
Sa pagkakapatalsik kay Sereno, masasabing tapos na ang kuwento. Mismong mga kasamahan ang nagpaalis sa kanya. Masasabing patas naman ang botohan ng mga mahistrado. Kung tutuusin, mabuti na ngang natapos na ang isyung ito at hindi na umabot pa sa impeachment ng mga mambabatas. Pagpipistahan lamang ng mga mambabatas ang Chief Justice gaya ng ginawa kay Corona. Mabuti ngang ang humatol kay Sereno ay mga kapwa mahistrado na hindi na dumaan pa sa mga mapanira at pangungutya.
Tapos na ang kuwento kaya dapat magsimula ang Korte Suprema sa bagong kabanata. Harapin na ang mga trabaho sapagkat ang mamamayan ang natatalo.
- Latest
