Maraming nabigo sa ‘tuwid na landas’
Matanda at bata nagpakitang lakas;
Ang kanilang galit biglang inilabas
Sila’y nagrehistro sa Comelec agad!
Iisa ang ibig na sabihin nito
Hangad nang marami mga pagbabago;
Pork barrel at DAP alisin na ito
Dahil sa masama naging liderato!
Maraming nagnais maging presidente
Mga matatandang may mga prinsipyo;
Ay hindi nangimi na magkandidato
Kaso ng SAF 44 bubuhayin dito!
Saka marami ring mga kabataan
Gusto’y mag-senador o mga congressman;
Ang totoong hangad sila’y nakalaang
Maglingkod ng tapat sa’ting bayan!
Paano’y nakita sa administrasyon
Maraming naglingkod na hindi tumugon;
Sa mga hinaing at mga panaghoy
Ng mga biktima ng bagyo’t koraps’yon!
Hinahanap nila ang maraming pera
Sa Yolanda victims ay dapat napunta;
Bakit daw nabulok bigas at delata
Na galing sa abroad: Europe-Amerika?
Saka ang salaping bigay ng gobyerno
Ito’y hinahanap nang maraming tao;
May mga pangalang nakalista rito
Pero di tumanggap ng kahit sentimo!
Kaya nang sumapit tawag ng Comelec
Daming nagpalista bilang candidates;
Kahit matatanda pawang nagnanais
Sila’y manungkulan sa pwestong napanis!