Maraming bayani itong ating bansa
ngayong Agosto ay dinadakila;
ang pangalan nila’y nasa historya
ang Araw ng Kagitingan sila’y kinilala!
Bukod sa kanila may dalawang bayani
na ngayong Agosto sila ay natangi;
ang una’y si Quezon naging Presidente --
pangalawa’y si Ninoy malinis ang budhi!
Ang pangulong ito’y si Manuel L. Quezon
hindi n’ya ininda kamatayan noon;
kalayaan natin kanyang ibinangon -
kaya tayong lahat ay malaya ngayon!
Noon ay bago pa itong ating bansa
mga bagong batas ay kanyang ginawa;
at una sa lahat magmahal sa wika
ang Wikang Tagalog ginawang pambansa!
Siya’y Presidente na walang katulad
na noo’y namuno sa baya’y matapat
itong ating bansa nabantog sa lahat
at ang bayan nati’y nahango sa hirap!
Pangalawang bayani – si Ninoy Aquino
na ang kamataya’y di niya sinanto;
nang siya’y umalis ang bansa’y magulo
nang siya’y umuwi pumayapa tayo!
Siya ay senador kaiba sa lahat
lubhang matalino at sa baya’y tapat;
hindi siya sakim hindi siya korap -
nang siya’y umuwi binaril sa tarmac!
Kung siya’y buhay pa tiyak bobotohan
posibleng pangulo habang nabubuhay;
itong ating bansa tahimik mayaman
hindi tulad ngayong lubog kahirapan!