EDITORYAL – DENR, dedma na lang sa basurang Canada

WALA pa ring masabi ang kalihim ng Department of Environment and Natural Resources (DENR) sa basurang Canada na ang mahigit sa 20 containers ay naitapon na sa Capas,Tarlac noong nakaraang buwan. Maaaring iniisip ng kalihim na mamamatay din ang isyu sa basura hanggang sa tuluyan na itong mawala. Maaaring mawala na ang nangangamoy na isyu pero hindi malilimutan ng mamamayan na naging inutil ang DENR sa isyung ito.

Walang ginawang aksiyon ang DENR secretary para magreklamo sa mga nakatataas kaugnay sa inangkat na basura ng Live Green Enteprises noong 2013. Ang mga basura na nasa 55 containers vans ay kinabibilangan ng hospital wastes. Nang buksan ng mga tauhan ng Bureau of Customs (BOC) ang mga container, natambad ang mga diapers, heringgilya, bandage, gasa at marami pang iba.  Sabi ng Customs, dineklara ng importer (noon ay kinilalang Chronic Plastics) na “scrap plastic materials for recycling” ang shipment. Dahil dito lumabag ang kompanya sa Republic Act No. 6969 o ang “Toxic Substances and Hazardous Wastes Control Act of 1990.” Ayon pa sa Customs, lumabag din ito sa Tariff and Customs Code ang nasabing importer.

Ang nakapagtataka pa sa ginawa ng DENR, dineklara nila na toxic at hazardous ang basura pero biglang binawi at sinabing non-toxic ang shipment. Biglang nabahag ang buntot ng DENR sapagkat maaari raw masira ang relasyon ng Pilipinas at Canada kapag naghain ng protesta. Kaya ang pinaka-remedyong naisip ng DENR ay itambak sa Capas ang mga basura. Palihim na dinala ang containers ng basura at itinapon sa landfill. Nag-rally ang mga tao nang malaman ang nangyari. Wala namang masabi si P-Noy kahit sa mismong probinsiya niya tinapon ang basura.

Ayon sa Basel Convention, ang anumang ha-zardous wastes na dumating sa bansa ay dapat ibalik sa pinanggalingang bansa. May karapatang tanggihan ng Pilipinas ang basura na galing Cana­da. At alam ito ng Canada dahil isa sila sa mga pumirma sa international treaty noong 1992.

Pero kailangang maghain muna ng protesta at reklamo ang Pilipinas bago dinggin ang kaso. At dito nagkulang ang DENR dahil hindi nila ginawa ang tungkulin kaugnay sa toxic na basurang galing sa Canada.