Pasko na Pasko na saka Bagong Taon
sasapit sa mundo sa bagong panahon;
At sa Paskong ito dapat mahinahon
mga mamamaya’y mabuti ang layon!
At sa Bagong Taon tiyak na sasapit
dapat nasa ayos ating mga isip;
Sapagka’t kung hindi tayo ay tatangis
sa mga gawaing sa bansa ay lihis!
Sa abot ng ating damdami’t isipan
wala pang naganap na tumpak sa bayan;
Mga nasa pwesto ng pamahalaan
ay pawang pahirap ang ating nakamtan!
Kaya sana naman ngayong Paskong ito
ay magsimula na mga pagbabago;
Ang mga opisyal sa ating gobyerno
hindi na matakaw sa pera ng tao!
At sa Bagong Taon ay magsimula na
na magbagumbuhay mga magsasaka;
Mga mangingisda’y mangisdang payapa
hindi pumapatay ng maraming isda!
Sa taong papasok sa loob ng bayan
sana’y mawala na ang mga patayan;
Mga mag-aaral nating kabataan
maging tapat sanang gabay ng magulang!
Dapat ding sa Pasko saka Bagong Taon
itong ating bansa ay maging mayabong;
Walang pulitikong masama ang misyon
hindi nagnanakaw – takot sa korapsyon!
Dapat ding isipin nitong sambayanan
masamang gawain ay may katapusan;
Tayo’y nasa islang ‘Perlas ng Silangan’
na laging makislap sa gabi at araw!