Maliit ang ating bansang Pilipinas
Kumpara sa mga bansang malalakas;
Pagmasdan mo sa mapa ating mamamalas
Ang US, ang Russia malaking di hamak!
Isa pang malaki ay ang bansang China
Bukod sa malawak maraming tao pa;
Mga bansang ito kapagka nanggiyera
Itong ating bansa’y bura na sa mapa!
Kaya lang ang ating bansang minamahal
Kahit na maliit malaya’t marangal;
Kalayaan nati’y pinakamamahal
Maubos man tayo ay handang mamatay!
At saka ang bansa kahit na maliit
Maraming biyayang dito’y mamamasid;
Ang likas na yaman ay nakapaligid
Sa dagat at bundok sa bayan at bukid!
Minsan ay may nakita ang mga dayuhan
Buhangin ng bansa ay pinag-intresan;
Ito’y patotoong likas nating yaman
Kahit na buhangin-perlas na makinang!
Kaya huwag sanang bansa ay sakupin
Ng bansang’malaki’t malakas sa atin;
Bansang maliliit na katabi natin
Tiyak na papanig sa ating layunin!
Bansang malalakas kung kayo’y tahimik
Kayo ay malayang sa ami’y lumapit;
Kayamanan likas na nakapaligid
Ibibigay naming kung kayo’y kapatid!