Hinahanap-hanap nating Pilipino
magandang panahon na waring nagtampo;
Tulad noong araw mga bata rito
pawang masunurin at walang sanggano!
Hinahanap-hanap sa bagong panahon
ang mga malalaking pawang mahinahon;
Sa maraming pook saanman paroon
sila’y maginoo’t walang asal maton!
Hinahanap-hanap sa likod ng ulap
liwanag ng araw sa buong magdamag;
Ulap nang maglaho’y nagliwanag agad
ang buong daigdig biglang lumiwanag!
Hinahanap-hanap si Rizal na tapat
sa kandilang ilaw siya ay nagsulat;
Ang hirap ng bayan kanyang naisulat
ang lambong ng dusa ay naglaho agad!
Hinahanap-hanap ang giting ni Andres
na kinikilalang lider na mabait;
Nagtatag ng KKK pinatay sa inggit
kung saan nalibing hindi natin batid!
Hinahanap-hanap leadership ni Quezon
saka ni Magsaysay na namuno noon;
Sila ay matapat at walang korapsiyon
walang anomalya na katulad ngayon!
Hinahanap natin ay bansang maunlad
na di tulad ngayong kunwari’y malakas;
Sa Sayyaf, NPA daming nauutas
at ngayo’y sa Intsik nanginginig agad!