Lumuluhang puso

(Alay kay REMEDIOS FLORES MAGADIA)

Pebrero 14 – kaibang Valentines

Ang sa akin ay sumapit na biglaan;

Dahil sa ang mutyang pinakamamahal

Sa tawag ng Diyos  biglang namaalam!

Sa pangalwang araw ngayong buwang ito

Doon sa ospital biglang nagkagulo;

Mga doctor at nars ay biglang nanlumo

Ang pulso ni Mahal payapang nag-zero!

Hinangad ng aking anak na panganay

Lagyan ng peacemaker ang dibdib ni Mahal;

Ang sabi ng isang doktorang maalam

Huwag nang gawin iyon di na kailangan!

Di na nga marapat dahil maya-maya

Hininga ni Mahal humintong payapa;

Kaya ako’t mga anak ay biglang nagluksa

Sa araw at gabi tiyak na luluha!

Ngayong Valentines Day luha at pighati

Ang sa bawa’t araw ay aming kalimpi;

Wala ang Mahal kong sa bawa’t sandali

Kapiling kasama sa lahat ng gawi!

Kaya anong saya nang mahihintay ko

Ngayong wala na nga kapilas ng puso?

Nagsumpaan kaming walang maglililo

Pag-ibig na tapat ang sumpa’t pangako!

Kaya ngayon Mahal sa iyong paglayo –

Tanging pabaon ko’y lumuluhang puso;

At saka ang diwang ngayo’y nasiphayo

Pagka’y Ikaw Mahal ang tanging kasuyo!