Ang pinadaylang nga paghatag og pabor sa inila ug gamhanan nga mga piniriso timaan sa dakong buslot sa sistema sa hustisya ug sa kapakyas sa gobyerno pagpatigbabaw sa labing batakang katungod sa mga sinumbong ug mga binilanggo--ang tawhanon nga prisohan.
Nagsige og tawag ang gobyerno sa mga prisohan nga rehabilitation centers. Aron pagpangangkon nga ang mga binilanggo wa lang siloti kon dili gihatagan pa gyod sa tanang kahigayonan nga mausab ug mahibalik isip mapuslanon nga mga sakop sa katilingban. Apan ang pait nga kamatuoran mao nga kutob ra ang gobyerno sa sulti. Way bisan unsang ikapakita sa buhat sa makiangayong pagtagad sa mga piniriso.
***
Ambot tungod ba kaha kay napasagdan ang kinabag-an sa mga binilanggo--naghuot ang ilang mga selda, kuwang ug dunot ang ilang pagkaon ug nahimo silang way kapilian nga mga konsumidor ug way katagoan nga mga biktima sa ilegal nga drugas, ilegal nga sugal, prostitusyon ug ubang susamang kriminalidad--namawi ang gobyerno kon dagkong mga negosyante o dagkong mga opisyal sa gobyerno ang kinahanglang ibalhog sa prisohan.
Kasagaran nila gitugotan nga mangasakit dayon ug kinahanglang ipabilin sa Veterans Memorial Medical Center (sa kaso ni kanhi presidente Gloria Arroyo) ug PNP General Hospital (sa kaso ni Senador Juan Ponce Enrile). Ang mga himsog pa dalidalian dayon og panday og luho nga custodial center sud sa Kampo Crame (sa kaso sa mga senador nga silang Jinggoy Estrada ug Bong Revilla).
***
Kabahin sa katin-awan ning kuwestiyonableng salida sa gobyerno mao ang kabalaka nga mabantang di lang sa kinabag-an sa katawhan kon dili hasta na sa ubang kanasuran ang masulub-on natong sistema sa mga bilanggoan. Ganahan sila nga ang krisis padayong lingiw-lingiwan, morang nuog nga matag karon ug unya kinahanglang silhigon ngadto sa daplin.
Kanunay gyong magkuwang ang kuwarta sa gobyerno kon ang dako ug dinaliang panginahanglan pagpalambo sa atong mga prisohan ang hisgutan. Nakawaldas og minilyon ka pesos alang sa flyovers ug skywalks nga way kapuslanan apan way igong pundo pagpaluag ug paglimpiyo sa mga selda.
***
Laing posibleng katin-awan, ug mahimong maoy labing dinalian nga hinungdan sa pagsabak-sabak nilang Arroyo, Enrile ug kaubanan, mao ang panagana nga kon dakdakan sila sa kinatibuk-an nga puwersa sa balaod mamahimo silang mga martir ngadto sa mga mata sa ilang mga dumadapig. Ug makaangkon na hinuon og kawsa pag-alsa ug pagtay-og sa hapit na manamilit nga pamunoan ni Presidente Noynoy Aquino.
Bisan unsa pay rason, sayop ang paghatag sa tanang pabor ngadto sa gamhanan ug inilang mga binilanggo. Samang sayop ang pagsalikway sa pagpalambo sa tanang bilanggoan sa nasud. Hangtod nga mausab ning mga sayopa, di matuman ang batakang tahas sa gobyerno pagpatuman sa balaod bisan kinsay maig-an, senador man o manananggot.
***
Email: leo_lastimosa@abs-cbn.com.