Tagalog, Cebuano transcribers hanap ng ICC
MANILA, Philippines — Hindi pa man nahuhuli si dating Pangulong Rodrigo Duterte ay naghahanap na ang International Criminal Court (ICC) ng mga transcribers na bihasa sa Tagalog/Filipino at Cebuano.
Sa website ng ICC, sa ilalim ng “vacancies” nakalagay na naghahanap ang Language Services Unit, Integrated Services Division, Office of the Prosecutor ng mga transcribers na ang haba ng kontrata ay ibabase sa “operational needs” ng ICC.
Matatandaan na nahuli ng ICC si Duterte noong Marso 11, 2025 dahil sa akusasyong krimen laban sa sangkatauhan kaugnay sa kanyang madugong kampanya laban sa ilegal na droga at agad itong dinala sa The Hague sa Netherlands.
Nagsimulang maghanap ng transcribers na magaling sa Tagalog/Filipino at Cebuano ang ICC hindi pa man nadadakip si Duterte noong Enero 28, 2025 at “open” o walang petsa ang deadline ng application.
Bagaman at hindi binanggit kung magkano ang magiging suweldo ng mga transcribers, nakalagay na ito ay “fixed rate” at “per work unit.”
Ang mga mapipiling freelance transcribers ay kailangang mabilis at “accurate” na makapag-transcribe mula sa audio o video recordings.
- Latest
