MANILA, Philippines — Taliwas sa panukala ng Metro Manila Development Authority (MMDA) na alisin na ang EDSA busway, nais naman ng Department of Transportation (DOTr) na paghusayin at ayusin pa ito katulong ang pribadong sektor at financial expertise.
Ayon kay Transportation Secretary Jaime Bautista, hinihintay lamang nila ang resulta ng feasibility study upang matukoy kung paano pa paghuhusayin ang EDSA busway. Layon aniya ng feasibility study na mapaganda pa ang karanasan ng mga commuters nang hindi lumalala ang kasalukuyang kondisyon ng trapiko.
Naniniwala rin si Bautista na ang EDSA busway ay nananatiling isa sa pinaka-episyenteng public road transport system sa Metro Manila kung saan batay sa kanilang datos noong 2024, mahigit sa 63 milyong commuters ang nag-enjoy sa episyenteng travel experience sa EDSA Busway.
Noong Enero 2025 lamang naman aniya, mahigit sa 5.5 milyong pasahero, na may average na 177,000 daily commuters, ang nakarating sa kanilang destinasyon ng mabilis, kumbinyente, at ligtas dahil sa busway.
Ayon pa sa DOTr, ang EDSA busway ay nakikitang krusyal na hakbang tungo sa progresibong public transportation system na may 23 istasyon, na nag-o-operate ng 24/7, at nakapagbibigay sa mga commuters ng isang ligtas at maaasahang opsiyon ng transportasyon.