MANILA, Philippines — Nagpahayag ng pagkadismaya ang isang grupo ng mga senior citizen sa Pasig City government dahil sa umano’y kulang na mga healthcare program at benefits na isa sa pinaka kailangang serbisyo ng mga matatandang Pasigueño.
Ayon kay Federation of Pasig Senior Citizens Association President Alexander Arreola, kulang ang medical mission para sa kanilang mga konsultasyon at check up lalo pa’t kailangan ng mga seniors ang regular na pagmomonitor sa kanilang kalusugan.
Bagaman mayroon umanong ibinibigay na medical services katulad ng iba’t ibang vaccines gaya ng animal bites vaccines, hindi naman umano ito sumasapat sa pangangailangan ng mga senior citizen.
Sinabi pa ni Arreola na matagal din umano ang pamimigay ng mga maintenance medicines sa mga matatandang Pasigueño dahil pinadaraan pa ang mga ito sa mga barangay ng lungsod. Ang iba pa umano sa mga ito ay malapit na ang expiration dates.
Giit naman ni FPSCA Vice President Reynaldo Malilay na matagal din umano ang bigayan ng mga gamot at maintenance.
Ito aniya ang dahilan kung bakit dinagsa ang medical mission ng St. Gerrard Charity Foundation na pinamahalaan ng pamilya ng Sarah Discaya o mas kilala sa tawag na Ate Sarah.
Sinabi naman ni Discaya na ito lamang ang isa sa kanyang mga paraan upang mapunan ang kakulangan ng city government sa benepisyong natatanggap sana ng Pasigueno.