Pulis, tinutukan ng baril 2 negosyante, GF sabit
MANILA, Philippines — Nahaharap ngayon sa kasong grave threats ang isang pulis matapos na umano’y tutukan ng baril ang dalawang negosyante nang makaalitan ang umano’y girlfriend ng una sa isang bar sa Quezon City kamakalawa ng madaling araw.
Kapwa nasa kustodiya na ng pulisya sina Pat. Nelson Morrondoz, Jr., 26 at kasintahang si Trisha Bocalbos, 18, receptionist.
Batay sa report, nangyari ang insidente dakong alas-4:50 ng madaling araw nitong Sabado sa harap ng Adrenaline Bar and Club 33 Scout Borromeo St, Diliman, Brgy. South Triangle, Quezon City.
Nabatid na palabas na ng nasabing bar a ng mga biktimang sina “Chester”, 23 at “Charles”, 38, nang dumaan si Bacolbos sa hallway na sinasabing lasing.
Binangga ni Bacolbos sina “Chester” at “Charles” at pinagtutulak hanggang sa makalabas ng bar na humantong sa pagtatalo.
Nakita naman ni Morrondoz ang komosyon at bumaba ng kotse at lumapit sa mga biktima.
Dito na tinutukan ng baril ni Morrondoz ang mga biktima na agad namang naawat ng bouncer na si Gino Santos.
Agad namang rumesponde ang mga pulis na sina Pat. Marvin Prado at Pat . Melvijohn Julong at binitbit ang kanilang kabaro at kasintahang si Bacolbos. Sasampahan ng kasong physical injury si Bacolbos.
Kinumpiska ng mga pulis ang isang baril na Canik TP9 na may bearing serial No. T6472-19BG19801.
Patuloy ang imbestigasyon ng pulisya sa insidente.
- Latest
