2 lalaking armado ng patalim, naghamon ng away timbog
MANILA, Philippines — Inaresto ng mga pulis ang dalawang armadong lalaking naghahamon ng away sa kalsada sa Quiapo, Manila kahapon ng madaling araw.
Nakapiit na at mahaharap sa mga kasong alarm and scandal at illegal possession of deadly weapon ang mga suspek na sina Abdulhakim Langgoyoan, 21, vendor ng Sto.Niño St., Pasay City at Badron Ento, 35, ng Quirino, Surigao Del Sur.
Batay sa ulat ng Sta. Cruz Police Station 3 (PS-3) ng Manila Police District (MPD), nabatid na dakong alas-12:30 ng madaling araw nang maaresto ang mga suspek sa Sales St., corner Paterno St., sa Quiapo.
Nauna rito, nakatanggap umano ng sumbong ang mga tauhan ng Alvarez Police Community Precinct (PCP) na may dalawang lalaking may hawak na kutsilyo at ice pick na nagwawala sa kalsada at naghahamon ng away.
Mabilis namang rumesponde ang mga pulis at nang mamataan ang mga suspek at kaagad na inaresto at binitbit sa presinto.
- Latest
